Make your own free website on Tripod.com

Random Thoughts

Some creations in Hindi...IV
Home
Spirituality and Indian Music
My Thoughts....
More Thoughts...
More Thoughts...
More thoughts....
More Thoughts...
More Thoughts....
My Poems....
Some creations in Hindi...I
Some Creations in Hindi...II
Some Creations in Hindi...III
Some creations in Hindi...IV
More Hindi Poems...
Hindi Poems continued.....
Contact Me

kuchh aur kavitaayein....

 
Bah jaane do
 
Achaanak hai ye toofan uthaa
ufaan ye umad raha
har taraf hai bheeshan baadh
gote khaa raha, ubhar raha
har disha mein bah rahaa
seemaheen ho bandhanmukt ho
chhootne ko tatpar kisi baan ki tarah
kaise rukega yeh ufaan
jahan thahrega tabaahee hogee
ki aaj ye bah jaaye tho achha
in aankhon se nikal jaaye tho achha
ruk gaya tho kisi din ye
traahi-traahi ke geet rachega
lahoo ban ke kai chitra rangega
chheen lega ye har sukoon ko
to bah jaane do iss garam khoon ko
varna thahree hui chhez sad jaati hai
dabee hui aag kahin badh jaati hai
isliye kholna bahut zaroori hai
jamaav ka pighalnaa zaroori hai
thokar samhalne ke liye hote hain
angaare bhadakne ke liye hote hain
so bah jaane do
aaj jal jaane do
khaaq ho jaoge tho jaan lena
bhasm ho jao tho maan lena
ki kuchh bachaa nahin ab jalne ko
shaam ho rahee hai ab dhalne ko
jeet tumhaari hai hey Arjun
Pa liya hai tumne uss asadhya ko

Dikhaave ki Ot se
 
Aadhunikta kee ot mein
kuchh aadamkaaleen nagna vichaar
aaj taandav kar rahe.
 
Oonche sinhaasan par baithe
badappan ka bhav liye
lipe-pute mukhaute ke peechhe
jhoothee shaan ke khule maidaan mein
daudte bhaagte ye jeev
ek doosre se takraate
shaaleenta ke parde mein
aaj nochte-nakodte
chadhaai chadh rahe.
Anjaan iss veebhatsa sach se
'main'ko chhaatee se chipkaye 
makhmalee jaama pahne
daud kee antim lakeer
ko chhoo  lene ki hod mein
dikhaave ke chamakte libaas  pahne
gande keechad ke daldal mein
aaj ye jeev samaa rahe, samaate jaa rahe....

Woh Lamhe
 
Har lamhaa kahin
ek puraane toote phoote se
dard kaa ahsaas dilaata hai
woh jo chhoot gaya
aaj bhi mere ird-gird mandaraata hai
main jhatak kar phenk doon magar
chipak kar uss ka koi hissaa
jo judaa chhoottha hee nahin
phir kisi puraane raat ka saya
mere chhat pe mandarata hai
door phenk chukee thee main usse
kahin se kisi ne uchhal diya phir
lapak kar na pakadoon soch kar bhi
girne na de saki usse
kabhie jo mera hissa tha
aaj koi chhor meree chhoti unglee
ke ek kone se bandhaa hai
jhatak kar chhuda loon main
magar aisa bandha ki chhoottha hee nahin
iss ummeed mein katthee hai
meree har shaam
ki kabhie tho ho shaamein meree
saaf suthree aur halkee
kabhie tho ye saamaan utaroon main
aur udoon aasmaan mein
ek khule parinde kee tarah


--Manoshi

Laut aayein woh pal agar...
 
Kya kabhie socha hai
ki khud ko ek baar
phir se udhedna
ek baar phir
unn guzre raston par chalna
kaisa hoga?
Kuchh yun hoga ki
kisi pahchaane thuT par
puraane paanvon ke nishaan
yun bhadde lagenge
ki ek baar phir thik se
chalne ko hoga mann
kisi bikhre phool kee
pankhudiyaan dekh kar
mann dahal uthega
ki inn ungliyon mein abhi bhi
khushboo basee hai
uss phool kee jo maine
apne ahankaar mein maslaa tha
woh samunder bhi dikh sakta hai
jahan lahron kee tez awaaz
ansunee kee thi maine
shayad woh ped bhi dikh jaaye
jiski pattiyon ko peele hote dekha tha
aur pathhar maar kar tode the phal
Aaj peechhe mudne se katraati hoon
ki mere bichhaye kaante
shaayad chubh jaayein
meree paanvon mein
aaj sochtee hoon ki ek baar koi
woh pal udhaar de de ya shayad
main unn palon ko phir chura
sanwaar paatee agar....


--Manoshi

Aasmaan

 

sitaron ka jamghat
chaandni ke chhitre kan
ek tukda baadal ka
aur halki neeli raat
kuchh pedoN ki kaali parchhaNyee
aur hoo-hoo karti awaaz
mere chhat ke munder par
mere saath chupchap bin kahe ek shabd
mera saath nibhata woh
ki dono ne ek saath guzaare hain
kai saare aise pal
aaj woh khali aur saaf,
kora aur khula
magar main rang chukee hoon
uski orr dekhtee
mugdh ho nihaarti
ki woh "aasmaan" hai aur
main zameen par ek tukda mitti ka.


--Manoshi

Phir Ek Khayaal
 
shaakh ke har patte par
apne khayal ko thahraane kee koshish
oss ki boond kee tarah
fisal gayee,
aakhirkaar gira aa ke zameen par,
aaj bhi vaheen padaa
oopar patton ki orr dekh rahaa
jaane kitne tarah se khud ko
bahlaane kee koshish
kisi bhi roshandaan kee taraf bhagta ye khayal
khwabon mein bhee khidkiyaan khatkhatana
ek dabee aarzoo ko paane ka pagalpan
haan pagalpan hee tho...
aaj lagta hai
waqt ganvaa diya shayad
ek vahee zameen hai jahan ho sakta hai woh
jahan jee sakta hai
kisi oonche shaakh ke patte par
ho naheen saktee jagah uskee
ki har cheez kee apnee jagah hotee hai
...ki main paa nahin saktee uss khayal ko".


--Manoshi

 
Ummeed...
 
kal ke kisi ummeed par
ki kahin na kahin
kuchh hoga
jeete hain aaj
ki kahin bhadakti hai aag tho
dabaa lete hain
ki 'kal'kuchha hoga,
'kal'hoga woh din
aaj nahin tho kya
kal zaroor hoga,
kal woh jo socha tha
sach hoga kal, haan kal
aur bas yun hi
guzartee hai zindagee
isee kal ki ummeed par
ki vaqt ka kya hai
woh tho guzarta hai
isee ummeed ki doree se lipat
guzar jayega
ki ye zindagi bhi kat jayegee
kai hazzaar zindagiyon ke saath
chupchap apne mein dabaaye
woh aag
bina bhadke, kisi se kuchh kahe
isee kal ki ummeed mein
ki kal kuchh zaroor hoga, kal.....

Ek aur yaad...
 
Door se tairta kaanon tak
ek pahchana sa aalaap
shaayad raag bhairavee ka
mann ko kahin nichodta
ki ye khatm hone ki nishaani hai'
band kar sametne kee pahchaan

mandra se taar tak chhooti yeh awaaz
andheree kothree ke kisi kone mein
dabe pade ek kahanee ko
halke se chhoo kar
ek ke baad ek
bina thame
ubhaar laati hain lahrein
zor-shor se bhadbhadaa kar
bhigo jaati hain mujhe
halkee lalima ke nepathya mein
taanon kee tez baarish se
machal jaata hai koi gahra shaant samudra
achanak hichkole khata
doobta, dubaata jhakjhorta
aur phir aakhiri tihaai ke saath
khatm hota poora hota samay
lambee jaagee raat ko
sametne ka samay
ki phir bikharne ka waqt hai
chhootne ka waqt
purane gaanthon mein, unn yaadon mein
ek aur gaandh baandhne ka waqt
hamesha kee tarah..."


--Manoshi

Moosladhaar Barish
 
Kal ki sham badee bhaari thi
moosladhar barish mein kahin
bahut kuchh bheeg raha tha
har pankhudi par jama thi
puraane udhde lamhon ki daastan
ek chhota sa lamha
tapak padaa kisi pankhudi ke kone se
uss lamhe ko bada
sahej kar rakha tha maine
chhitar gayee woh boond aaj
ki uss boond ke peechhe
boondon ka silsila jo chal padaa
ek ruka hua sailaab
baandh tod kar toot padaa
ki bahut dinon baad barish hui thi
moosladhar barish...

Waqt

"peechhe se mand padtee
kanon tak pahunchtee
ek khseen hotee awaaz...
Saanp jaisa rengta har kshan
usse rokne kee meree koshish
uss chabootre par der tak
khade rahne ka mera sankalp
aur mann hi mann muskarata,
mere pagalpan par hansta 'waqt'
ki 'waqt'ne ek parchee di thi
ek baar chhoo lene ko wo manch
ek mauka dikhane ka apna kartab
lambee qataar thi mere peechhe
ki achanak uss parchee ko
chheen liya waqt ne
main chillaati rahee
ek baar, bas ek baar
aur peechhe se awaaz aati rahee
kanon tak pahunchtee rahee
naye kartab dikhane walon kee
mand padtee, khsheen hotee awaaz...


--Manoshi

Enter supporting content here