Nishabd...
sookhe aansuon ke nishaan band padee siski dhoo-dhoo karti aag aur ek gahree khamoshi kal
maaloom hua mujhe ki sannaata bhi cheekhta hai khamoshi kar jaati hai har haal bayaan nishabd uss bahte paani
ko dekha hai bina kahe un shabdon ko suna hai maine ki kal ghar phunka hai uska kal chaand chhupa hai uska kal
aag lagee hain kahin ki shabd bhari pad gaye usse aaj raakh ud rahee uske apne ki nishabd..."
Ichha...
"Rupahale bel ki jakdan Jis se maine apne ko baandh rakha tha Kuchh yun jaise mere
sapnon Tak pahunchne ki seedhi ho woh Ek sunahree chaadar Sar se paavon tak odh rakhee thi maine Jaise sach
kee teekhi dhoop Cheer kar pahunch abhi Jalaa degi mujhe Jagmagaate shokh rangon se ranga tha Meree chaahaton
ko maine Yun jaise sachchaai ke rang ko Kahin chhupa raha ho ye mann Amarbel ki tarah panaptee Kisi aag ki lapat
ki tarah dhoo dhoo kar badhtee aakash mein patang ki tarah dhratal se door oonchee aur oonchee udtee meree ichhayein, mere
sapnon kee reshmee dori se bandhee mere saath chalee hain kabhi na chhotne ke liye nirantar, lagaatar..."
Shor...
Kal ki raat bahut kaali thi Badaa shor tha har taraf Ummeedon ki chatakhne ki awaaz Jaise
toot rahee hon sookhi tahniyaan Jhanjhanaa kar sheeshon ke bartan Bikhar rahe the yahan wahan Saayn-saayn karta akela
toofaan Takra raha tha deewaron se Aur tez awaaz ke saath kahin khare paani ka ek fawwaara bhi phoot padaa tha
andhere mein Gote khaa raha tha uss sailaab mein Tho kabhi ghamon ke andhere mein Idhar-udhar bhatak raha tha mann Ki
achaanak ek halki khat-khatahat ne Saansein rok li jaise Ek tez roshni ki dhaar Ghuss aayee thi mere ghar ke andar Aur
Shor tham gaya achanak hi Dil dahla rahee thi khamoshi Sannaata chubh raha tha kaanon ko... Ki ek alhad fusfusaahat Se
raha na gaya tha shayad Machal padaa kahne ko Ki zindagi abhi bhi baaqi hai Khatm kab hota hai Koi rasta yun aasani
se Yahan bheed hai badi awaazon ki Savera phoot padaa hai chalo Zindagi bulaati hai tumhein Dafna do kal ki raat
ka shor Aur chal pado aage… khaamoshi se...
|